Medidas laborais de miséria para a juventude

Julho 16, 2014 | Notícias, Que nom te deixem parad@. Revolta-te!, Sócio-laboral

20140527_185434

O governo insiste nas bonificaçons a empresas para contrataçom de jovens. Esta fórmula, repetida até desviar milhons de euros públicos todos os anos aos patrons como prémio por contratar gente nova, nunca tem demonstrado na prática a sua funcionalidade. Se o consolo é que sem estas políticas lucrativas para o empresariado a juventude poderia estar pior… entom melhor mudar o sistema inteiro.

O governo espanhol nom trabalhou, ou nom se lembrou, ou nom tinha nem ideia de como investir os mais de 1.800 milhons de euros da UE em fundos para atençom à juventude. Porque o plano apresentado em 5 de julho estava a piques de superar o limite permitido pola UE para designar os recursos.

Nengumha das políticas adoptadas polo governo espanhol com cargo aos fundos públicos tem sido orientada para conseguir que as horas extras, as jornadas nom quotizadas ou os horários laborais se adaptem à lei burguesa de trabalho. Nom. Para isso a juventude nom temos governo. Temo-lo só para incentivar que nos contratem em troca de pagar-lhes do nosso próprio peto umha parte substanciosa do que nos devem em salário. Mesmo quando este nom se ajusta à quantidade de trabalho, distribuiçom de horas, noturnidade, perigosidade, e horas nom pagas.

Ao governo o único que lhe interessa é fazer como quem que fai. Anunciar novas medidas e ter pendentes aos empresários de mais euros vindos do céu a cada pouco tempo com políticas orientadas todas na linha de recompensar a contrataçom, como se esta nom representasse o próprio negócio das empresas. E que @s jovens continuemos a acreditar que… “polo menos, temos um emprego durante um tempo”.

ATÉ O INFINITO COM AS PRÁTICAS E A FORMAÇOM

Os contratos de formaçom e aprendizagem, que som precisamente os mais instáveis e precários, som os que o governo incentiva com estas bonificaçons. Claramente, um remendo para achicar algo de água… A mais, a formaçom regrada por instituiçons públicas compensará a que por obriga devem fazer as empresas do pessoal em formaçom. E por se nom fosse suficiente, as bonificaçons já nom serám só por cada jovem em formaçom, mas também cumulativamente por “lotes” de jovens nesse status. Os empresários somarám 5 jovens em formaçom mais outros cinco… e poderá-lhes sair a soma a bonificar por 15…

O que nom explica o governo é como pretende emendar a reduçom de défice que tem que fazer por obriga constitucional para 2015 com umha reforma fiscal que rebaixará em 9.000 milhons os € a ingressar polo Estado (previsons oficiais) graças à reduçom dos tipos às rendas mais altas, se a maiores continua a rebaixar com bonificaçons as cargas impositivas dos empresários.

Entretanto, a juventude trabalhadora continuará a aceitar contratos de miséria para ir tirando, até encontrar algo no estrangeiro que safe a situaçom…