Iniciativa ampla da esquerda independentista em Trasancos para lembrar o Moncho Reboiras
Agosto 10, 2015 | Atos, Em destaque
A Comissom Moncho Reboiras, iniciativa apartidária da esquerda independentista de Trasancos, convoca para a próxima semana vários atos com que homenagear ao grande exemplo da revoluçom galega que foi o jovem Reboiras.
Um dia antes do cabodano do seu assassinato, 11 de agosto, o historiador Eliseo Fernandes, junto com Inacio Hernando, antigo camarada do Moncho nos 70, e o trasanquês Joám Lopes falarám numha palestra chamada “Moncho Reboiras. Semente de vencer”. Será a partir das 20h no Ateneu ferrolám, no centro da cidade.
Ao dia seguinte, quando se fam 40 anos de ser baleado pola polícia perto da casa do Concelho, realizará-se um mural coletivo às 10h30 no bairro da Madalena, onde decorreram os feitos. À noitinha continuarám as reivindicaçons com umha concentraçom às 20h30 na Rua da Terra, ao pé do portal onde foi morto, com umha intervençom política e várias poéticas de patriotas galegas e galegos como Ramiro V. Alvarinho, Pim Patinho, Miguel “Vento de Trasancos” e Lara Soto.
BRIGA parabeniza-se da consecuçom deste ato amplo à volta dum nexo de uniom da esquerda nacional viva na comarca nortenha. Apelamos à juventude da zona a secundar as convocatórias, a ilustrar-se sobre a figura do histórico referente da juventude revolucionária (que vai para além da sua presença em murais), e a berrar alto e forte por umha Galiza obreira livre.
A jornada acabará na Fundaçom Artábria, no bairro operário de Esteiro, com umha grelhada popular às 21h30.
