Grupo de Base de Compostela tira do prelo mais um número da folha agitativa

Com este novo número do Pedra Vermelha, @s jovens organizad@s em BRIGA queremos denunciar o silenciamento ao que o  governo municipal pretende submeter aos movimentos  populares, eliminando quase todos os painéis para a colagem de cartazes e transformando a cidade numha espécie de parque temático para turistas, que esconda o apodrecimento da corrupta câmara municipal.

Eis o texto completo:

O corrupto governo do PP de Compostela continua com a sua linha política de repressom e perseguiçom da liberdade de expressom do povo compostelano. Assim, nos últimos meses vimos como foi implementando o que deve ser um dos seus principais objetivos programáticos ao mando do governo municipal e nom, lamentavelmente, esse objetivo nom parece ser o castigo exemplar da corruçom nas suas fileiras, tampouco o de melhorar as condiçons socio-laborais da vizinhança, e nem tam sequer o de preservar os parques e espaços naturais da cidade.

Sim parece ser pola contra, um dos seus objetivos transformar Compostela numha espécie de cidade “postal”, numha cidade de conto onde há parques infantis a cada 100 metros, flores coloridas e amáveis “nativ@s” que recebam com um obrigado sorriso aos centos de turistas que nos visitam cada dia.

Umha cidade onde nom se visualize qualquer conflito social, onde as flores e parques ocultem umha realidade de desemprego e miséria, de fileiras intermináveis no INEM e nas cozinhas económicas, de centenas de pessoas apanhando que comer no lixo, de jovens que em Lavacolha se despidem forçadamente da Galiza para procurar emprego no estrangeiro, de protestos populares e manifestaçons polos direitos sociais e liberdades que aniquilam, de concentraçons contra a corruçom do governo municipal…

O PP quer transformar Compostela na sua particular “cidade de bonec@s” onde o profundo conflito de classes que se vive nas ruas do nosso país fique ocultado com umha estética “cursi” e artificial, que nada tem a ver com a realidade. O último dos seus contributos a criar essa cidade digna do famoso “Show de Truman” foi a eliminaçom de todo espaço da cidade disponível para a colagem de cartazes e difusom de mensagens por parte dos movimentos populares.

Ficamos assim só com um par de painéis em toda a cidade . Painéis que praticamente carecem de visibilidade, que é claramente o que pretende a filofascista  câmara municipal: fazer invisível qualquer protesto ou discurso contrário à sua reacionária ideologia.

Todo isto contrasta ademais com o alto nível de repressom que vivemos @s que decidimos nom submeter-nos aos seus contínuos ataques. E é que nom som poucas as vezes que tivemos que viver as retençons e perseguiçons da polícia, a última há umhas semanas, quando 4 companheir@s fomos retid@s  pola  polícia espanhola polo simples facto de colar cartazes reivindicando o 1º de maio.

A manobra é clara: nom querem que os movimentos populares, as organizaçons políticas, sociais, sindicais, as associaçons vizinhais… nos expressemos na rua, e se o fazemos mandam aos mercenários do Estado a perseguir-nos.

@s jovens de BRIGA em Compostela nom imos ficar parad@s e continuaremos saindo à rua a denunciar, esta e todas as medidas fascistas de um governo apodrecido que o único que pretende e  apagar o cheiro desse apodrecimento “redecorando a cidade” para que semelhe que todo vai bem.

E é que como bem dizíamos na campanha de aquele 24 de julho do 2011, A RUA É NOSSA, e nem a sua repressom, nem as leis de corte fascista nos vam deixar calad@s.

As jovens de BRIGA animamos à juventude de Compostela a rebelar-se e nom aceitar que nos deixem sem os nossos espaços de difusom e expressom de ideias.

QUE A REPRESSOM NOM TE DEIXE PARAD@. REVOLTA-TE!