DECORREU A XIII ESCOLA DE FORMAÇOM

11, 12 e 13 deste mês de março fôrom os dias escolhidos pola organizaçom juvenil da esquerda independentista BRIGA para umha das nossas citas anuais mais importantes: a Escola de Formaçom, que este ano decorreu na comarca de Trasancos. Um encontro nacional no que destaca especialmente o seu plano formativo, mas onde o estabelecemento de laços de solidariedade e camaradagem é também piar fundamental nestas jornadas.

A noite da sexta-feira chegamos a Ferrol um grupo de militantes e achegad@s de diferentes lugares da geografia galega para, após as boas-vindas a cargo dum militante da comarca, dar começo a esta XIII ediçom da Escola de Formaçom. Começamos as atividades formativas com um jogo no que pugemos em prática os nossos conhecimentos sobre história da luita operária e da mulher galega, mas que nos serviu especialmente para aprender de maneira coletiva.

No dia seguinte, sábado, trás o almorço dirigimo-nos cara o centro de Ferrol, onde nos esperava o nosso guia Marcos Abalde para realizar o roteiro “Ferrol rebelde”, um passo por distintos pontos da cidade referenciais nas luitas populares que se dérom durante século e meio, e que nos demonstram mais umha vez que a história do nosso País está cheia de honrosos episódios de desafio ao poder estabelecido. Finalizado o roteiro, deslocamo-nos ao Castelo de Sam Filipe para poder jantar ao ar livre, pois o tempo acompanhou estes dias ainda hibernais.

Já pola tarde decorreu a projeçom pública do documentário Fios Fora, graças ao trabalho e ajuda de Ilha Bufarda, as realizadoras da obra, e à Fundaçom Artábria, o centro social que cedeu o seu espaço para várias das atividades que desenvolvimos. Fôrom mais de três horas entre emissom e debate, este último mui frutífero, que nos serviu nom só para ver a crua realidade do desmantelamento da indústria têxtil galega e as suas consequências sobre as mulheres trabalhadoras e sobre as camadas populares em geral, mas também para aprofundar nas causas destas dinámicas do Capitalismo e na reflexom conjunta arredor das alternativas que a juventude obreira organizada podemos oferecer.

Nessa noite, os jovens Eira contribuiu a seguir fazendo desta XIII Escola de Formaçom umha jornada inesquecível, com um concerto na Artábria aberto ao público, que ademais ajuda a avançar a música em galego normalizando o seu uso monolingüe.

Chegado domingo, dedicamos a manhá à formaçom desta volta no ámbito sindical. Carlos G. Seoane, membro de BRIGA desde a sua fundaçom em 2004 até 2013, foi o encarregado de ministrar umha palestra de grande interesse para qualquer jovem rebelde, na que por umha parte desenvolveu vários aspetos no plano teórico sobre intervençom sindical e pola outra narrou-nos experiências práticas da luita operária organizada que à mocidade nos poderám servir de exemplo para futuros conflitos similares.

Finalizamos este evento com umha assembleia valorizativa da Escola de Formaçom, na que todas e todos concordamos no positivo do encontro e na necessidade de continuar caminhando nesta direçom, contruindo consciência de classe e com a segurança de que só a auto-organizaçom nos levará à vitória.

Avante a juventude revolucionária organizada !

Avante BRIGA !