CANCELAÇOM DA JORNADA DE REBELIOM JUVENIL 2020

Maio 20, 2020 | Atos, Notícias

Quando se promulgou o estado de alarma, começárom a colocar-se-nos dúvidas sobre se seria possível a celebraçom da décimo sexta Jornada de Rebeliom Juvenil o vindouro 24 de julho de 2020, data para a que já levávamos meses trabalhando.  Porém num primeiro momento decidiu-se aguardar a evoluçom dos factos e, após analisarmos a conveniência de realizar ou nom as tradicionais atuaçons musicais da noite da véspera ao Dia da Pátria, chegamos à conclusom de que o mais viável será a cancelaçom da XVI Jornada de Rebeliom Juvenil por diferentes fatores.

Em primeiro lugar, e embora desconheçamos em que grau da arquinomeada “nova normalidade” estaremos para a data referida, achamos que seria umha irresponsabilidade pola nossa parte celebrar, durante um contexto de pandemia mundial, um evento onde se podem produzir aglomeraçons e onde nom estaríamos capacitadas nem material nem humanamente para garantir a segurança e as medidas de prevençom necessárias para reduzir riscos. O primordial para nós é a saúde do Povo e, numhas condiçons em que nom podemos garanti-la consideramos que o nosso dever como jovens revolucionárias é nom pô-la em risco.

Em segundo lugar, a JRJ é um evento totalmente autogerido que nom se financia com nengumha ajuda pública, mas com um trabalho de arrecadaçom que ocupa parte dos nossos esforços militantes. Nom somos alheios à incipiente crise económica e somos plenamente cientes das imensas dificuldades que afetará, também ao financiamento da Jornada. Nunca foi a JRJ umha atividade com a que BRIGA baseia o seu financiamento, mas é umha aposta política enfocada a dar pequenos passos face à consecuçom de espaços de lazer que fujam das lógicas mercantilizadoras e nocivas para a juventude, um espaço onde tenham cabida discursos contra-hegemônicos e onde se cumpram as palavras de ordem: “festa sim, luita também” ,polo que a grande maioria da recadaçom vai destinada a cobrir as despesas de infraestrutura, das artistas etc. É por isso que no plano econômico se nos fai impossível podermos levar a cabo o evento num contexto onde as tarefas de financiaçom sejam inviáveis.

A JRJ nom é simplesmente a celebraçom duns concertos, a JRJ entendemo-la como umha jornada de luita para a juventude rebelde galega. É umha jornada de confronto contra Espanha, contra o Patriarcado e contra o Capital onde as jovens saímos às ruas na defesa dumha vida digna num País soberano, onde reivindicamos o nosso potencial transformador para mudarmos todo, onde aprendermos umhas das outras e onde tecer os laços dum movimento que deve estar sempre nas múltiplas formas de combate pola nossa emancipaçom nacional e social de género. É por isso que mália esta cancelaçom nom vamos ficar na casa e continuaremos a ter o 24 de julho como um dia referencial no qual desenvolver atividades que deem continuidade ao nosso agir diário.

 

Vemo-nos em 2021! Avante a juventude rebelde galega!

 

Mesa Nacional de BRIGA.

Na Galiza, 20 de maio de 2020JRJ