10M: ONTEM E HOJE, ISTO É LUITA DE CLASSES!

Março 9, 2016 | Em destaque

Cartaz 10M 2016

O 10 de março de 1972 dous trabalhadores galegos, Amador e Daniel, eram assassinados em Ferrol por defenderem melhores condiçons laborais nos estaleiros de Bazám, ao tempo que dúzias de operários resultavam feridos, processados e/ou despedidos por dárem um exemplo de coerência e unidade obreira.

Hoje, 44 anos depois, comemoramos o Dia da Classe Obreira Galega em lembrança a uns fatos que situárom às e os operários galegos como um sujeito político rebelde, consciente da sua condiçom de explorad@s e com potencialidade para disputar o poder à burguesia.

Assim pois, muito longe de pretendermos fazer do 10M umha simples efeméride que nos permita amparar-nos num passado de luita, as mozas e mozos da classe trabahadora galega, devemos trazer o 10 de março aos nossos dias, nom só aprendendo das melhores liçons dos e das nossas devanceiras mas também, e sobretudo, fazendo desta data umha jornada de conscienciaçom e de reafirmaçom no nosso orgulho de classe.

E a melhor maneira de expressar o nosso orgulho por pertencermos à classe obreira galega é a luita polos nossos interesses coletivos. A batalha diária contra o emprego precário, contra a emigraçom, contra a repressom sindical, contra o desemprego, contra as ETTs… é tam imprescindível como a coordenaçom de forças e a complementaçom de sinergias entre todas e todos os trabalhadores galegos.

A especial crueza da situaçom socio-laboral da mocidade no nosso país deve ser contestada com um enfoque juvenil e adaptado à realidade atual mas com a mesma rebeldia com que Amador e Daniel junto a muitas e muitos mais luitadores anónimos, soubérom plantar cara às constantes agressons da burguesia.

Porque ontem e hoje, isto é luita de classes! Ganhemos nós!