Neste domingo tinjamos de lilás as ruas de Vigo
Junho 12, 2014 | Em destaque, Feminismo e Antipatriarcado
Umha vez mais, o feminismo galego sairá às ruas numha jornada reivindicativa em que reclamaremos a potestade sobre os nossos corpos.
Organizada pola Plataforma Galega Polo Direito ao Aborto, a agenda deste domingo na cidade olívica começa com umha manifestaçom que sairá da estaçom de comboios de Vigo-Guixar às 12h, e que rematará com umha assembleia aberta de rua. Posteriormente, terá lugar a romaria com um jantar de confraternizaçom, amenizado por atuaçons musicais e teatrais que se prolongarám até as 18h.
Como já temos denunciado, a reforma da Lei do Aborto é um gravíssimo ataque contra a autonomia das mulheres. Nom só se menospreza a nossa capacidade de decisom, senom que somos legislativamente infantilizadas. Pom-se num segundo lugar a nossa integridade física e psicológica, pondo em risco as nossas vidas, especialmente a de aquelas mulheres com umhas condiçons de vida mais precárias, setor entre o que nos encontramos as jovens da classe trabalhadora.
É por isso que animamos às jovens galegas a assistirem a esta jornada com a vontade de mostrar como o feminismo galego nom só é o suficientemente forte como para afrontar com dignidade os embates com que nos golpeiam diariamente, senom que temos o poder para lançar o vindouro ataque, um ataque que deixará abalando o sistema patriarco-burguês.
Vemo-nos no domingo às 12h na estaçom de comboios de Vigo-Guixar.
As jovens rebeldes revoltamo-nos contra o Patriarcado!
