[LUGO] NOM À ORDENAÇA MORDAÇA

Maio 19, 2018 | Em destaque

FAIXAMORDAÇA

No passado mês de abril de 2018 saltou aos meios umha notícia que chamou a atençom: “O concelho de Lugo proibe manter relaçons sexuais dentro dum carro em espaços públicos”. Algumhas pessoas tomarom-na com humor, mas isto era simplesmente umha parte do que nos aguardava. Com isto dava-se a conhecer a nova Ordenança municipal de segurança cidadá, que já se conhece na cidade como Ordenança Mordaça, a versom local da Lei Mordaça. Esta nova ordenanza supom um grande ataque para os movimentos sociais com presença na cidade, já que esta nova ordenanza prevê importantes multas pola realizaçom de tarefas totalmente normais e quotidianas para qualquer militante ou ativista, como pode ser algo tam simples como a colagem de cartazes ou reparto de propaganda na rua.

Ademais disto supom um importante recorte das liberdades para todo o povo lugués, já que sanciona açons como jogar à bola ou fazer acrobacias com umha bicicleta, sanciona as capas populares que mais duramente padecem a miséria à que nos condena este sistema e que se vêm obrigadas a dormirem na rua, ou a tentar ganhar alguns dinheiros mediante a venda de panos num semáforo ou a realizaçom de malabares. Totalmente delirante e ilógico.

IMG_20180519_003907

A seguir detalhamos alguns pontos com as multas que se proponhem para diferentes atividades:

  • Proibiçom às associaçons, coletivos sociais… de colar cartazes, recolher assinaturas, repartir brochuras ou pendurar faixas. Sanciona-se com até 3.000 € e a polícia pode confiscar o material
  • Realizaçom de acrobacias com patinete ou bicicleta ou  jogar à bola na rua até 1500 euros de multa
  • Persecuçom e multas a mulheres em situaçom de prostituiçom
  • Pedir esmola na via pública ou realizar a venda de pequenos objetos como panos etc será sancionado com até 3.000 euros
  • Durmir num banco ou colocar umha cadeira na via pública: até 750 €

Entendemos esta lei como um verdadeiro ataque encabezado PSdeG que, com a cumplicidade das formaçons ultra-direitistas PP e Cs, tenta fazer de Lugo um mini-feudo a imagem e semelhança do modelo que a nível estatal se quer impor sob o eufemismo de “segurança cidadá”. O regime fecha filas em favor do seu modelo de hegemonia perante todo movimento crítico ou dissidente, elaborando umha lei própria de tempos ainda mais escuros, onde a criminalizaçom dos coletivos sociais está à ordem do dia, onde fomenta a denúncia vizinhal, alentando os chivataços no seu intuito de animar as pessoas a seguirem atitudes para-policiais denunciando quem tem ao carom em favor de quem ostenta o poder político na cidade, camuflando isto de “civismo” e “cidadania exemplar” mas que fomenta a desconfiança e o enfrentamento entre iguais e criando falsa sensaçom de segurança em base a sermos ainda menos livres.

A juventude organizada em BRIGA temos mui claro que esta nova ordenanza nom pode sair adiante, nom estamos dispostas a ceder nem um mínimo para que quem pretende converter Lugo numha cidade autoritária e anti-popular onde se nos roubem cada vez mais direitos, criminalizando e perseguindo toda atividade que nom se ajusta aos esquemas sociais que lhes interessa aos partidos do regime.

Nom estamos dispostas a aceitar umha ordenanza que ninguém pediu, umha ordenanza para nada necessária e que nom contribui a solucionar a multidom de problemáticas que a juventude luguesa, a povoaçom de Lugo e que a própria cidade enfrentam, senom que a criminalizar, censurar e fazer de Lugo umha cidade sem vida.

SE O CONCELHO AMORDAÇA, A JUVENTUDE REBELDE RECHAÇA

GALEGA, JOVEM E REBELDE, CONTRA A ORDENANÇA MORDAÇA, ORGANIZA-TE PARA VENCER

NOM À NOVA ORDENANÇA MUNICIPAL!

IMG_20180518_221135