BRIGA começa nova campanha nacional: Que nom te deixem parad@. Revolta-te!

As e os jovens rebeldes organizad@s em BRIGA saudamos este novo ano que recém acaba de começar, realizando um prognóstico mui claro: 2014 virá marcado pola contínua intensificaçom dos ataques que a burguesia dirige contra o povo trabalhador galego e em especial, contra a juventude e as mulheres.

E afirmamos isto nom em base a interpretaçons vácuas ou amparando-nos em posturas catastrofistas, mas tendo mui presente a realidade atual que como jovens, trabalhador@s e mulheres, estamos a padecer.

Conhecidos som os dados que os próprios gestores do sistema emitem e que certificam às claras que a juventude trabalhadora galega está sendo conduzida para umha situaçom insustentável, caraterizada pola exasperaçom do crescente desemprego, a resignaçom ante a exploraçom laboral em trabalhos altamente precarizados ou a fugida da miséria que leva ao êxodo juvenil que já define a Galiza atual.

Com umha taxa de desemprego juvenil que ronda 50%, com taxas de emancipaçom de jovens entre 16 e 30 anos que nom superam 20% e com as alarmantes cifras de mais de 15.000 moças/os que abandonárom a Galiza no último ano, nom precisamos de mais nengum dado para justificar a necessidade urgente dumha resposta que encare a ofensiva neoliberal que se continua impondo na Galiza com a rubrica da “Marca España”.

Umha resposta que BRIGA quer dar como sempre o leva fazendo, desenvolvendo a necessária luita desde o principal espaço de intervençom da juventude independentista e revolucionária: as ruas do nosso país. É por isto que, sob a legenda “Que nom te deixem parad@. REVOLTA-TE”, BRIGA dá começo a umha nova campanha nacional que pretende espalhar as reivindicaçons da juventude rebelde e combativa por toda a nossa geografia, mediante um intenso trabalho agitativo e propagandístico e a concatenaçom de açons que desde as diversas comarcas da Galiza contribuam a alargar a resposta juvenil organizada contra Espanha, o Patriarcado e o Capital.

“Que nom te deixem parad@. REVOLTA-TE”, é a mensagem que queremos enviar ao conjunto da juventude trabalhadora e popular galega em clara alusom a umha das nossas principais problemáticas: o elevado desemprego juvenil. Face a fácil frustraçom, passividade e resignaçom perante um presente adverso, BRIGA nom só manifesta a sua força e crescente motivaçom por luitar e atingir sucessos, mas também queremos somar mais jovens ao entusiasmo de dotarmo-nos dum objetivo e sabermo-nos partícipes dum necessário projeto de emancipaçom nacional, de classe e de género.

Nom há dúvida de que paradas e parados nos pretendem deixar. Paralisad@s e calad@s polo medo ante o alargamento da repressom com medidas como a Lei de Segurança Cidadá que contempla, aliás, protocolos de atuaçom exclusivos para aplicar contra a juventude rebelde e combativa; alienad@s e adoutrinad@s no espanholismo e na criminal lógica do capitalismo com a aprovaçom da elitista LOMQE; submetidas, cousificadas e privadas de exercer a soberania sobre o nosso próprio corpo com a clandestinizaçom do aborto e a transferência do poder de decisom das mulheres para o integrismo católico; em definitiva, dóceis, vulneráveis e incapacitad@s para defender-nos ante os contínuos ataques que recebemos.

Sobram motivos, pois, para assumirmos o iniludível compromisso de exercer a nossa auto-defesa, tomarmos consciência de que somos o único sujeito responsável pola nossa emancipaçom e que como tal, nom só temos o legítimo dever mas também a obriga de rebelar-nos.

Em BRIGA assumimos com firmeza este compromisso e esta campanha nacional que agora encetamos pretende ser mais um contributo da juventude revolucionária galega de hoje para a configuraçom dumha verdadeira rebeliom que nos faga avançar no caminho certo dumha Galiza independente, socialista e nom patriarcal.

Que nom te deixem parad@. REVOLTA-TE!